Comissom Técnica desenvolve os acordos do último plenário sobre o relançamento de Causa Galiza
Neste sábado celebrou-se em Compostela umha nova Comissom Técnica de Causa Galiza posterior ao nosso último Plenário Nacional. O encontro serviu para concretar as propostas de relançamento da iniciativa, tanto no fortalecimento dos órgaos nacionais da iniciativa popular e da rede de assembleias comarcais, como da projecçom dumha intervençom sistemática para socializar a necessidade do direito de autodeterminaçom.
Além dos aspectos organizativos, que se concretarám na potencializaçom da comunicaçom externa, do aparato financeiro e das responsabilidades nacionais, definiu-se a participaçom de Causa Galiza na manifestaçom contra a instalaçom da incineradora a celebrar no domingo 29 no Irijo, os preparativos da homenagem anual aos Mártires de Carral que neste ano se celebrará em Cacheiras e a participaçom nas mobilizaçons de 8 e 10 de Março.
Ciclo sobre 1972
O relançamento de Causa Galiza pivotará fundamentalmente sobre a rede territorial de assembleias que sustentam a intervençom da iniciativa. Assim, nas próximas semanas, celebraremos assembleias comarcais e locais em distintos pontos do País para por em comum a programaçom de trabalho trimestral, continuar com a acumulaçom de forças por volta da reivindicaçom da necessidade do direito de autodeterminaçom como única alternativa à actual crise económica, social e política e incidir com mais força na sociedade galega.
As históricas luitas operárias de 1972, que possibilitárom o nascimento dum sindicalismo nacional e supugérom o salto qualitativo na construçom do nacionalismo contemporáneo, terám um apartado especial na programaçom de trabalho deste curso político. Por parte da iniciativa popular pola autodeterminaçom, além de por em valor a significaçom histórica de 1972 e a sua relaçom como o presente de crise económica, social e política, trabalhará-se desde as comarcas para socializar a necessidade que tem a classe trabalhadora galega de conquistar a soberania nacional.
