Stop 'Vuelta a España'! Galiza Naçom. Autoderminaçom

1º Queremos denunciar a presença da 'Vuelta a España 2011' no nosso País. Hoje, por muito que se empenhem as autoridades políticas e desportivas estatais, por muito que nos neguem, Galiza é umha naçom. Umha naçom que nom se resigna a ser umha 'región española' e que reivindica a sua plenitude como país. O seu direito a ser e a decidir. Neste sentido, queremos transmitir à sociedade que consideramos a presença desta importante prova ciclista espanhola no nosso território como ofensiva para a nossa condiçom nacional, as nossas reivindicaçons como povo e a nossa vontade de ser umha naçom soberana.

2º A presença da 'Vuelta a España 2011' na Galiza produz-se quando o Governo espanhol (PSOE) impossibilita que os desportistas galegos e galegas compitamos livremente com selecçons próprias a nível internacional representando o nosso País. Aliás, a actual administraçom autonómica que preside Alberto Núñez Feijoo (PP) pratica umha beligeráncia sistemática contra o desporto galego de base e as nossas selecçons. Os últimos episódios desta obsessom materializárom-se na eliminaçom das ajudas económicas para encontros internacionais de fútebol com participaçom galega e na supressom da equipa galega de ciclismo profissional Xacobeo Galicia. Assim, tanto PSOE como PP boicotam a possibilidade de que Galiza participe em condiçons de igualdade com outros povos nas competiçons desportivas internacionais.

3º Neste contexto em que a Galiza é negada antidemocraticamente como naçom e sujeito de direitos políticos e em que, como fruto desta negaçom, os desportistas galegos e galegas nom podemos competir com selecçons próprias, a presença da 'Vuelta a España 2011' no nosso território é interpretada por nós como imposiçom e tentativa de humilhaçom. É por estas razons que nas etapas dos dias 31 de Agosto e 1 e 2 de Setembro animamos à sociedade galega a denegar a bem-vinda à 'Vuelta' e a respostar com força, imaginaçom e criatividade a presença desta prova desportiva que nom tem sítio no nosso País. Isto nom é Espanha.

4º Fazemos extensivo este chamamento a sumar esforços e mobilizar-se contra a 'Vuelta a España 2011' a todas as organizaçons sociais, sindicais e políticas nacionalistas e independentistas, à cidadania que se sinte galega de naçom, à militáncia galega, para que nestas três etapas se visibilize para a Galiza e para o mundo que somos um povo vivo, que nom somos Espanha e que estamos dispostos e dispostas a reivindicarmos o que nos corresponde: sermos donos e donas do nosso destino, decidir livremente o nosso futuro, superar o actual esquema de negaçom e imposiçom e representar-nos por nós próprios sem intermediários impostos.

Galiza, em 28 de Agosto de 2011